Umsagnir

Umsögn Jens Jenssonar

Hvað hefur Hlutverkasetur gert fyrir mig?

Ég verð að segja að þegar ég heyrði fyrst um Hlutverkasetur vissi ég ekki á hverju ég ætti von. Læknirinn minn hafði beðið mig að kíkja á staðinn með opnum huga og með miklum semingi samþykkti ég að skoða staðinn. Ég bjóst ekki við að ég mundi finna þar eitthvað fyrir mig því ég hafði farið á netið og ekki litist á nein þeirra úrræða sem ég hafði skoðað.

Ég mætti á föstudegi eftir hádegi, töluvert stressaður. Ég vissi ekki hvort læknirinn minn hefði haft samband og hvað þeim hefði farið á milli. Stressið var það mikið að það lá við að ég mætti ekki á staðinn en ég lét mig hafa það og mætti þarna um klukkan eitt á föstudegi og þar tóku þær Kristín, Helga og Ebba á móti mér. Kristín sýndi mér staðinn og útskýrði hvaða námskeið væru í gangi og við skoðuðum töfluna þar sem námskeiðin voru auglýst. Í framhaldi af því var útskýrt hvað væri ætlast til af mér. Ég gæti mætt á þeim tíma sem ég vildi og það væri ekki gerð nein krafa um að ég gerði eitthvað ákveðið, það væri allgjörlega undir mér komið hvað ég vildi gera innan Hlutverkasetursins og hvað ég notaði mikið af úrræðum Hlutverkaseturs.

Það að gera ekki neinar kröfur til mín um að vera í einhverju námskeiði eða að gera eitthvað ákveðið hentaði mér mjög vel því ég var ekki tilbúinn, á þeim tíma, til að standa undir einhverjum kröfum um að gera eitthvað sérstak, annars fengi ég enga þjónustu, samber á sumum stöðum þarf maður að sanna sig fyrst til að fá þjónustu og ef þú sannar þig ekki á réttan hátt þá fær maður ekki neina þjónustu og þá er maður útilokaður frá þeirri þjónustu sem maður er að biðja um.

Þetta frjálsræði sem er í Hlutverkasetri virkaði rosalega vel fyrir mig og þegar að var tilbúinn að gera eitthvað þá fékk ég frábæran stuðning frá þeim öllum, hver á sinn hátt. Ég vildi fara að skrifa sögu sem er búin að þvælast í hausnum á mér í ein þrjátíu ár og Ebba sagði mér að setjast við tölvuna og fara að skrifa, að það mundi eitthvað koma út úr því, bara skrifa þegar ég treyst mér til og svo þegar að ég vildi gera eitthvað annað þá mundu þær hjálpa mér með þann stuðning sem ég þyrfti.

Það sem mér hefur fundist best við Hlutverkasetur er að þegar einhver er tilbúinn að gera eitthvað sér til gagns, þá fær sá einstaklingur þá hvatningu og þann stuðning sem hann þarf til að gera það að veruleika, án þess að vera með of mikinn þrýsting. Fljótlega fór ég að fara á hin ýmsu námskeið og hef haft mjög gaman af þeim og svo er líka gott stundum að gera ekki neitt og bara setjast niður og tala um þau mál sem eru efst á baugi á hverjum tíma. Mér virðist það vera sérstaða Hlutverkaseturs að þar kemur fólk á sínum forsendum og það getur komið á þeim tíma sem það vill. Það að fá þann stuðning og þá hvatningu sem það þarf á þeim tíma þegar fólk vill, það virðist virka best.

Ef ég á að segja hvað sé það mikilvægasa sem Hlutverkasetur hefur gert fyrir mig, þá er það sjálftraustið sem hefur aukist töluvert. Ég er orðinn öruggari með mannleg samskipti á þeim tíma sem ég hef verðið í Hlutverkasetri. Ég hef séð marga koma hér í Hlutverkasetur niðurbrotna, en svo eftir smátíma hefur maður séð sjálftraustið aukast hægt og rólega og það er alveg mjög mismunandi hvað fólk þarf að mæta mikið til að maður sjái áberandi mun. Ég get haldið svona áfram en ég læt þetta duga að sinni. Þetta er mín saga varðandi Hlutverkasetur. Kveðja Jens Jensson

Hópumsögn þeirra sem stunduðu starfsendurhæfingu 2008

Við sem höfum stundað Hlutverkasetur settumst niður og ákváðum að setja á blað, af hverju við stunduðum Hlutverkasetur. Eitt er að vita og finna innra með sér hver ástæðan er og annað að koma henni á blað svo vel sé. Hér skal reynt, af bestu getu, að gera grein fyrir tilfinningum okkar.

1.Af hverju stunda ég Hlutverkasetur?
Þjóðfélagsþegnum verður það æ betur ljóst hversu einmanalegt og niðurdrepandi það er fyrir fólk  að vera aleitt heima vikum og mánuðum saman. Þeir sem hafa barist við þunglyndi og kvíða  hafa reynslu af slíkri upplifun og vita hvað þessi tími getur verið ömurlega erfiður. Hinir sem hafa misst vinnu og/eða dottið út úr skóla vegna veikinda eiga ekki síður erfiða tíma og oftast fer það svo að viðkomandi liggur út af, meiri huta dagsins, og ekkert verður úr verki. Þegar fólk er komið í þá aðstöðu að fara aldrei út að hreyfa sig, hittir mjög sjaldan eða aldrei annað fólk og hefur enga eirð til að lesa eða stunda nám þá er voðinn vís, nema eitthvað sérstakt gerist í þjóðfélaginu til að bjarga málum.  Við teljum okkur hafa verið svo heppin að finna þetta „sérstaka.“

Hlutverkasetur hvetur okkur til að fara á fætur að morgni og við lítum á það sem okkar vinnustað á meðan við erum að ná upp nægilegri orku til að drífa okkur aftur út. Í raun verður því ekki með orðum lýst hversu mikilvægt það er að hafa stað eins og Hlutverkasetur, þar sem alltaf bíða manns verkefni og góðir vinnufélagar og leiðbeinendur.

2.Hvert er markmiðið með veru okkar hér?
Fyrst og síðast er markmiðið að ná fyrri virkni, orku og heilsu. Jafnframt vitum við öll, af eigin reynslu, að það er mikið áfall, þegar maður áttar sig á því, einn góðan veðurdag, að fyrri orka er horfin og við fyllumst vonleysi, því enginn veit í raun hvenær hún kemur aftur. Hér hvetjum við hvort annað og starfsfólkið heldur með okkur fundi og hvetur okkur áfram.

Ekki má gleyma að hér vinna starfsmenn, í fullu samráði við okkur, að því að byggja upp námskeið, sem verða okkur  til framdráttar, þegar við förum aftur að sækja um vinnu og/eða skóla. Má þar nefna námskeið í: myndlist, vélritun, powerpoint.  Powerpointnámskeiðið er einnig hugsað til að við æfumst í að koma fram og ræða við lítinn hóp, svara fyrirspurnum og reyna að sigrast á þeim kvíða, sem fylgir því að standa upp og tala.
Einnig hefur verið boðið upp á námskeið í sjálfstyrkingu, leikist, samskiptum, meðvirkni og venjumótun.

3.Hvar værum við ef ekkert Hlutverkasetur væri til?
Vissulega eru til fleiri staðir, sem vinna að velferð þeirra, sem glíma við sálfélagsleg vandamál. Kannski væru einhver okkar þar, en enginn vafi er heldur á því að sum okkar væru á geðdeild og önnur væru heima og hreyfðu sig jafnvel ekki úr húsi. Það er því ljóst að Hlutverkasetur hefur verið ómetanlegt fyrir okkur.